ປະໂຫຍດຂອງການສວດມົນ

ປະໂຫຍດຂອງການສວດມົນ

ການສວດມົນມີປະໂຫຍດນັບອະເນກປະກາດ ໃນຄຳພີພຣະໄຕຣປິດົກເຫລັ້ມທີ່ 10 ບັນທຶກໄວ້ດັ່ງຕໍ່ໄປນີ້:

1. ເຂົ້າໃຈພຣະທັມຄຳສອນຢ່າງແຈ່ມກະຈ່າງ

2.​ລ່າເລິ່ງເບີກບານໃຈ

3.    ອີ່ມເອີບໃຈ

4.    ກາຍສະຫງົບ ລະຫງັບ 

5.    ມີຄວາມສຸກ

6.    ຈິດເປັນສະມາທິ

7.    ເປັນເຫດແຫ່ງຄວາມຫລຸດພົ້ນຈາກກິເລດ

ຄວາມເປັນມາຂອງການສວດມົນ

ຄຳວ່າ​​ "ມົນ" ຫຍໍ້ມາຈາກຄຳເຕັມວ່າ "ພຸທທະມົນ" ເຊິ່ງຫມາຍເຖິງພຣະທັມຄຳສັງສອນຂອງພະອໍຣະຫັນສັມມາສັມພຸທທະເຈົ້າ ການສວດມົນຈຶ່ງຫມາຍເຖິງ ການສວດພຣະທັມຄຳສັ່ງສອນຂອງພຣະສັມມາສັມພຸທທະເຈົ້ານັ້ນເອງ.

ຄວາມເປັນມາຂອງການສວດມົນນັ້ນ ເລີ່ມຕົ້ນມາຈາກຄວາມພະຍາຍາມໃນການຈົດຈຳຄຳສ່ັງສອນຂອງພຣະພຸທທະເຈົ້າຂອງບັນດາພຣະອະຣິຍະສາວົກໃນຄັ້ງພຸທທະການ ກ່າວຄື ທຸກຄັ້ງທີ່ພຣະພຸທທະເຈົ້າທຣົງສະແດງທັມນັ້ນ ພຣະສາວົກແຕ່ລະຮູບແຕ່ລະອົງຈະຊ່ວຍກັນຈົດຈຳພຣະທັມຄຳສອນນັ້ນ ແລ້ວຖ່າຍທອດສູ່ສິດຂອງຕົນ ໂດຍລະບົບຈາກຄູສູ່ລູກສິດ ກ່າວຄື ຄູຟັງມາຈາກພຣະພຸທທະເຈົ້າ ນຳມາເລົ່າໃຫ້ສິດຟັງ ສິດຈຳຄຳບອກເລົ່າຂອງຄູ ແລ້ວນຳໄປສວດສານຍາຍຈົນຈຳໄດ້ຄລ່ອງປາກ ຂຶ້ນໃຈ ຮັກສາໄວ້ແລ້ວ ຈິ່ງຖ່າຍທອດຕໍ່ໃຫ້ຄົນອື່ນໆ ໃນສຳນັກໃນເວລາຕໍ່ມາເຮົາເອີ້ນຂະບວນການທົງຈຳພຣະທັມຄຳສັງສອນແບບນີ້ວ່າ ເປັນລະບົບ "ມູຂປາຕະ" ຄື ລະບົບຈາກປາກສູ່ປາກ

ທັມມະສອນໃຈ

ທັມມະສອນໃຈ ຈາກພຣະອາຈານ ພິກຂຸ 

-    ທີ່ສູງຍ່ອມກາບໄຫວ້

-    ທີ່ໃກ້ຍ່ອມບູຊາ

-    ກະຕັນຍູກະຕະເວທີຕາ

-    ພໍ່ແມ່ເປັນເພື່ອນທີ່ໃກ້ຊິດ

-    ພໍ່ແມ່ເປັນມິດຢູ່ໃນເຮືອນ

-    ພໍ່ແມ່ເປັນເພື່ອນຢູ່ໃນບ້ານ

-    ພໍ່ແມ່ເປັນອາຈາກຂອງລູກທຸກຄົນ ລູກທຸກຄົນຄວນກາບໄຫວ້ ສັກກາລະບູຊາ ຄຸນຂອງທ່ານ ລ້ຽງດູທ່ານໃຫ້ມີຄວາມສຸກໃນບັ້ນປາຍຊີວິດຂອງທ່ານ

-    ເບິ່ງພໍ່ເບິ່ງແມ່ໃຫ້ເບິງຕອນເຖົ້າຕອນແກ່

ຜູ້ຂຽນ

ຜູ້ຂຽນ:

ພຣະພຸດທະສາສະຫນາເປັນເລື່ອງໃກ້ຕົວຫລາຍ ຄົນໃຫ້ຄວາມສົນໃຈ ແຕ່ຄວາມສົນໃຈນັ້ນກໍ່ກັບກາຍມາເປັນຄວາມບໍ່ເຂົ້າໃຈສາເຫດ ກໍ່ຍ້ອນບໍ່ຮູ້ຄວາມຫມາຍ ດັ່ງທີ່ເຮົາເຄີຍເຫັນທົ່ວໄປຍາດໂຍນິມົນພຣະໄປສູດບ້ານສູດເຮືອນກໍ່ພາກັນວົນແຊວ ບໍ່ມີຄວາມເຄົາລົບໃນທັມ ສາເຫດກໍ່ດັ່ງທີ່ກ່າວມາຂ້າງເທິງ ມີແຕ່ຢາກໃຫ້ພຣະສູດໃຫ້ແລ້ວໄວໄວພໍຈະໄດ້ເຮັດແນວອື່ນທີ່ບໍ່ແມ່ນຈຸດປະສົງທີ່ແທ້ຈິງ ຂອງການເຮັດບຸນດັ່ງນັ້ນ ອາຕະມາຈຶ່ງມີຄວາມຄິດຢາກຈະໃຫ້ຫລາຍຄົນເຂົ້າໃຈຄວາມຫມາຍ ບົດສູດແຕ່ລະບົດ ຫລັງຈາກເຮົາເຂົ້າໃຈແລ້ວ ຊາບຊຶ້ງແລ້ວ ໃນທັມເຫລົ່ານີ້ ແລະ ຈະຄ່ອຍ ໆ ເຊື່ອມເຂົ້າຈິດໃຈເຮົາ ສຸດທ້າຍເຮົາເອງຈະກາຍເປັນຄົນທີ່ມີຄວາມເຄົາລົບໃນທັມແບບສົມບູນ, ມີຄວາມລະອາຍຕໍ່ບາບ, ອະກຸສົນທັງປວງທີ່ເຮັດແລ້ວນຳຄວາມທຸກມາໃຫ້ທັງໂລກນີ້ ແລະ ໂລກຫນ້າ, ຫາກເຮົາເຂົ້າໃຈດັ່ງນີ້ແລ້ວ ສຸດທ້າຍເຮົາເອງອາດເປັນຍາດທີ່ໃກ້ຊິດທີ່ສຸດຂອງພຣະພຸດທະສາສະຫນາທັງເປັນຜູ້ສືບທອດທີ່ແທ້ຈິງອີກດ້ວຍ.

     ສຸດທ້າຍນີ້ ອາຕະມາເອງ ໃນນາມຜູ້ຂຽນຫວັງວ່າປຶ້ມຫົວນີ້ ອາດໃຫ້ຄວາມຮູ້ບໍ່ຫລາຍກໍ່ຫນ້ອຍ ສຳລັບທ່ານຜູ້ອ່ານ ແລະ ທ່ານຜູ້ສົນໃຈໃນທັມທັງຫລາຍ ອີກສິ່ງຫນຶ່ງທີ່ຫລີກລ້ຽງບໍ່ໄດ້ນັ້ນ ຄື ຄວາມຜິດພາດ ຂໍ້ຂາດຕົກບົກຜ່ອງໃນການໃຊ້ສັພ, ໃຊ້ສະຣະ, ພະຍັນຊະນະ ຫາກທ່ານຜູ້ອ່ານພົບ ເຫັນກະລຸນາສົ່ງຄໍາຄິດເຫັນຂອງທ່ານມາຫາອາຕາມາດ້ວຍ ເພື່ອເປັນແວ່ນແຍງໃນການຈັດພິມຄັ້ງຕໍ່ໄປ.

ຂໍຂອບໃຈ

ໂດຍ: ມຸຕຕະຈິດໂຕ ພິກຂຸ ສີທອງ ຈັນສະຫມຸດ